حرام عليكى ياستى ضيعتى عليا الامتحان برغيك الكتير ده
ده كان اخر امتحان ليا .. تعالو شوفوا ستى عملت فيا ايه قبل الامتحان..........
الله أكبر الله أكبر..أذان الظهر..
يارب.. يارب بحق ده الآدان تنجح يا حورس يابن ابنى وأشوفك دكتور أد الدنيا -
ياستى بس أنا فى تجارة-
وماله يابنى هو يكتر على ربنا...... ده ربنا قادر على كل شئ -
ياستى ونعم بالله بس اللى بيطلع دكتور لازم يكون فى كلية الطب مش التجارة-
ياللا تجارة تجارة ..ومالها التجارة ..دى حتى التجارة شطارة..ده جدك يواد كان تاجر فى الوكالة أد الدنيا -
ياستى التجارة اللى فى الوكالة حاجة واللى فى الكلية حاجة تانية -
ع العموم شد حيلك أنته وانا أخلى جدك يخدك معاه الوكاله عشان تتدردح وتتودك كده يواد فى السوق -
جدى إيه اللى هايخدنى معاه .....ده جدى مات من زمان ياستى-
يامصيبتى عبد الواحد مات..ياحبيبى ياأخويا..مكنش يومك ياسبعى مكنشششش يوووومك -
ياستى ده ميت من تلتين سنة-
تلتين سنه..
ده العمر بيجرى يابنى تصدق ولا حسيت بيهم...
.ياللا أهو غار فى داهيه....قطعه وقطعت -سيرته.
.ده كان بخل الدنيا فيه.
.أن ما عمره دخل عليه ببطيخةولاكيس لب حتى
ياستى حرااام عليكى عايز أذاكر بقى-
يوه ه..وأنا ماسكاك ياوله..ذاكر ...ذاكرعشان ربنا يكرمك وتنجح وتاخد الدبلون-
ياستى دبلون إيه.. انا فى الجامعة وبعدين أسمه البكالوريوس-
أنته عتضحك عليه ياوله..أسمه الدبلون ده الواد ابن فايزة كان جدع زيك كده فى الثانوية العامة وخد الدبلون-
خلاص دبلوم دبلوم ياستى ..سيبينى بقى عشان أذاكر ارحمينى -
-ذاكر ..ذاكر ياأخويا ذاكر... تعرف ياواد
..ندرن عليا يوم ماتنجح لأكون رايحه خاطبالك عبير بنت فوزية...
.دى إيه ياواد.. أدب وأخلاق..وعلام كمانياستى عبير دى معاها ابتدائية -
-وماله يابنى ...الراجل مايعبهوش إلا جيبه
راجل ...راجل مين ياستى...عبير دى بنت -
-عبير ...عبير مين ياوله..أنته بتعرف بنات من ورانا
لا إله إلا الله....أبوس رجلك ياستى أرحمينى بقه -
-طب ذاكر....ذاكر جتك نيله وأنته طالع براوى كده زى أمك...
.قطعتها وقطعت سيرتها..
.أنامش عارفه أبوك كان أجوزها على إيه . ميزيييسسز..حــــكم...
قال لبس البوصة تبقى عروسة..بس انا مش اسكت انا لازم مبوظه الخطوبة دى ومجوزاه أنيسة بنت أختى
-ياستى خطوبة إيه..
أبويا مجوز أمى من خمسة وعشرين سنة ..
وبعدين أنيسة دى بنت أخوك مش بنت أختك .
.وأساسا إنتى ملكيش إخوات بنات
صحيح ياوله ..أنته عندك حق أنا مليش إخوات بنات..أصلى أناأمى ماكنتش بتخلف صبيان-
حراااااااااااااااااااااااااااااااااام ... انا اتجننت خلاص ياستى ......... ستى ماتطلعى البلكونة شويه ...ده الهوا حلو بره جداااا -
لأياخويـا.... فى جدع كده حليوه وشعره مسبسب فى البلكونه اللى فى الوش بيقعد يعاكسنى وبيبسبسللى-
خلاص روحى المطبخ ...أهو زمان أمى خلصت الرز-
رز...رز إيه يابنى....هوأنا ليه سنان للرز...أناهطلع البلكونه أحسن-
طب أبقى خلى بالك م الهوى ياستى-
ومن ابن الجيران
هوى لما يلطشك.ـ
الحمد لله أخيرا خرجت وقدرت أذاكر .. رحت الأمتحان تانى يوم وربنا كرمني وحليت كويس لكن للأسف المراقب سحب مني الورقة قبل ما أكتب أهم حاجة فيها
ياترى أنا كان إسمى إيه؟؟ ياترى كان إسمى إيه؟؟ ونسيت اسمى ...........
الابراج
الأحد يناير 24, 2010 4:07 pm
